पहिलो चरणमा २१ राज्य र केन्द्र प्रशासित १०२ सीटमा आज मतदान हुँदै
काठमाडौं । भारतमा आजदेखि आम निर्वाचन सुरु भएको छ । सात चरणमा हुने लोकसभा चुनाव आजदेखि सुरु भएको हो । पहिलो चरणमा नेपालसँग सीमा जोडिएका पाँचवटै राज्यहरु- सिक्किम, पश्चिम बंगाल, बिहार, उत्तर प्रदेश र उत्तराखण्डसमेत २१ राज्यमा बिहान ७ बजेदेखि मतदान भइरहेको छ ।
पहिलो चरणमा २१ राज्यका केही मतदान केन्द्रहरु र केन्द्र शासित प्रदेशका समेत गरी १०२ सिटमा मतदान हुँदैछ । लोकसभाका कुल ५४३ सिटका लागि हुने निर्वाचन ८० दिनसम्म चल्ने छ ।
पहिलो चरणमा अरुणाचल प्रदेश, असम, बिहार, छत्तीसगढ, मध्यप्रदेश, महाराष्ट्र, मणिपुर, मेघालय र मिजोरममा मतदान भइरहेको छ । आज पहिलो चरणमै नागाल्याण्ड, राजस्थान, सिक्किम, तमिलनाडु, त्रिपुरा, उत्तरप्रदेश, उत्तराखण्ड, पश्चिम बंगालमा पनि मतदान भइरहेको छ ।
केन्द्र शासित अण्डमान निकोबार, जम्मू कश्मीर, लक्षद्वीप र पुडुचेरीमा पनि आजै मतदान भइरहेको छ ।
पहिलो चरणमा आज नरेन्द्र मोदीको मन्त्रिपरिषदका ८ मन्त्रीसहित तीनजना पूर्वमुख्यमन्त्री र एकजना पूर्वराज्यपाल समेत चुनावी मैदानमा उत्रेका छन् ।
केन्द्रीय सडक यातायात मन्त्री नितिन गडकरी महाराष्ट्रको नागपुर सिटबाट चुनाव लडिरहेका छन् । गडकरी यहाँबाट ह्याट्रिक गर्ने प्रयासमा छन् ।
केन्द्रीय पृथ्वी विज्ञान तथा खाद्य प्रशोधन उद्योग मन्त्री किरेन रिजिजु अरुणाचल पश्चिम सीटबाट चुनाव लड्दैछन् । सन् २००४ मा रिजिजु पहिलो पटक यहाँबाट विजयी भएका थिए । तर, २००९ को चुनावमा उनी पराजित भएका थिए । त्यसपछि सन् २०१४ र २०१९ मा जिते । यसपटक उनको सामना अरुणाचल प्रदेश कांग्रेसका पूर्वमुख्यमन्त्री तथा प्रदेश अध्यक्ष नबम टुकीसँग हुँदैछ ।
त्यसैगरी केन्द्रीय बन्दरगाह, जहाज र जलमार्ग, आयुष मन्त्री सर्वानन्द सोनेवाल असमको डिब्रुगढ लोकसभा सीटबाट उम्मेदवार बनेका छन् । यो सिटबाट भाजपाले पेट्रोलियम तथा प्राकृतिक ग्यास राज्यमन्त्री रामेश्वर तेलीको टिकट रद्द गरेर सोनोवाललाई उम्मेदवार बनाएको हो ।
सोनेवाल हाल माथिल्लो सदन राज्यसभाका सदस्य एवं आसामका पूर्वमुख्यमन्त्री पनि हुन् । उनले २०१४ को चुनाव लखिमपुर सिटबाट जितेका थिए । सोनेवाल नरेन्द्र मोदीको पहिलो सरकारमा पनि मन्त्री भएका थिए ।
संसारको सबैभन्दा ठूलो लोकतान्त्रिक देश भारतमा ९६.८ करोड मतदाताले भोट हाल्नेछन् ।
आज पहिलो चरणमै सबै सिटमा मतदान हुने राज्य –
तमिलनाडु- ३९ सीट ।
उत्तराखण्ड- ५ सिट ।
अरुणाचल प्रदेश- २ सीट
अण्डमान निकोबार टापू- १ सीट
लक्षद्वीप- १ सीट
मेघालय- २ सिट
मिजोरम- १ सीट
नागाल्याण्ड- १ सिट
पुडुचेरी- १ सीट
सिक्किम- १ सीट
ठूला राज्यमा आज हुने मतदान
उत्तर प्रदेश : ८ सिट – सहारनपुर, कैराना, मुजफ्फरनगर, बिजनौर, नगिना, मुरादाबाद, रामपुर र पिलीभीत ।
पश्चिम बंगाल : ३ सिट – कुचबिहार, अलीपुरद्वार र जलपाईगुडी ।
बिहार : ४ सिट – औरंगाबाद, गया, नवादा र जमुई।
जम्मू कश्मीर : १ सिट – उधमपुर ।
महाराष्ट्र : ५ सिट – रामटेक, नागपुर, भंडारा–गोन्डिया, गडचिरोली–चिमुर र चन्द्रपुर ।
मध्य प्रदेश : ६ सिट – सिधी, शहडोल, जबलपुर, मण्डला, बालाघाट र छिन्दवाड़ा ।
आसाम : ५ सिट – काजिरंगा, सोनितपुर, लखिमपुर, डिब्रुगढ र जोरहाट ।
छत्तीसगढ : १ सीट – बस्तर ।
राजस्थान : १२ सिट – गंगानगर, बिकानेर, चुरु, झुन्झुनु, सिकर, जयपुर ग्रामीण, जयपुर, अलवर, भरतपुर, करौली–ढोलपुर, दौसा, र नागौर ।
त्रिपुरा १ सीट – त्रिपुरा पश्चिम ।
मणिपुर १ सिट– भित्री मणिपुर ।
(स्रोत : बीबीसी हिन्दी)
यो खबर पढेर तपाईलाई कस्तो महसुस भयो ?
1
