राजविराज । सप्तरीको राजविराज बजारका व्यवसायीहरूले बिटौरी जग्गाको लालपुर्जा उपलब्ध गराउन माग गर्दै राजविराज नगरपालिकाको कार्यालयमा लगाएको ताला मंगलबार दिउँसो प्रहरीले तोडेको छ। ताला तोडिएपछि आक्रोशित व्यवसायीहरू सडकमा उत्रिएर प्रदर्शन गरेका छन् भने राजविराज बजारसमेत बन्द गराएका छन्।
बिटौरी जग्गामा लामो समयदेखि व्यवसाय सञ्चालन गर्दै आएका व्यवसायीहरूले जग्गाधनी प्रमाणपुर्जा (लालपुर्जा) उपलब्ध गराउनुपर्ने माग राख्दै केही दिनदेखि आन्दोलन गरिरहेका छन्। सोही क्रममा उनीहरूले नगरपालिकाको मुख्य कार्यालयमा ताला लगाएका थिए।
मंगलबार दिउँसो सुरक्षाकर्मीको उपस्थितिमा ताला तोडिएपछि आन्दोलनकारी व्यवसायीहरू थप आक्रोशित बनेका हुन्। उनीहरूले नगरपालिकाको निर्णयप्रति असन्तुष्टि जनाउँदै बजार क्षेत्रमा नाराबाजी तथा प्रदर्शन गरेका थिए। विरोधस्वरूप अधिकांश पसल तथा व्यवसायिक प्रतिष्ठान बन्द गराइएको स्थानीयले बताएका छन्।
आन्दोलनरत व्यवसायीहरूले वर्षौंदेखि बिटौरी जग्गामा बसोबास तथा व्यापार गर्दै आए पनि हालसम्म लालपुर्जा प्राप्त गर्न नसकेको गुनासो गरेका छन्। उनीहरूले सरकारले उचित निकास नदिए आन्दोलनलाई थप सशक्त बनाउने चेतावनी दिएका छन्।
यता, नगरपालिकाका अधिकारीहरूले भने कार्यालयको नियमित सेवा प्रवाह प्रभावित भएकाले कानुनी प्रक्रिया अनुसार ताला खोलिएको बताएका छन्। बिटौरी जग्गा सम्बन्धी विषय संघीय सरकार तथा सम्बन्धित निकायको नीतिगत निर्णयसँग जोडिएको भन्दै समाधानका लागि पहल भइरहेको जनाइएको छ।
बिटौरी जग्गाको स्वामित्व सम्बन्धी विवाद र लालपुर्जाको मागलाई लिएर राजविराजमा पछिल्लो समय आन्दोलन चर्किंदै गएको छ। व्यवसायी र सरोकारवाला पक्षबीच सहमति हुन नसक्दा समस्या अझ जटिल बन्दै गएको स्थानीयवासीको भनाइ छ।
यो खबर पढेर तपाईलाई कस्तो महसुस भयो ?
