Image copyright.‘वीमेन्स एसिया कप’का लागि छनोट भएको नेपाली महिला क्रिकेट टोलीका खेलाडीहरुले अर्को महिना हुने सो प्रतियोगितामा टेस्ट राष्ट्रलाई हराउने लक्ष्य राखेको बताएका छन्।
हङकङमा सञ्चालन भइरहेको विश्वकप क्रिकेटको एसियाली छनोटमा शनिबार चीनलाई हराएर दोस्रो स्थान हात पार्दै नेपाली महिला टोली एसिया कपमा छानिएको थियो।
एसिया कपमा नेपालले थाइल्याण्डसहित भारत, पाकिस्तान, श्रीलंका र बांग्लादेशसंग खेल्ने छ।
पहिलो पटक
विश्वकप छनोट प्रतियोगिताको एसियाली छनोटमा उपविजेता भएर ‘वीमेन्स एसिया कप’मा छनोट भएको नेपाली महिला क्रिकेट टोलीले सो प्रतियोगितामा भारत र पाकिस्तान जस्ता टेस्ट राष्ट्रसंग पहिलो पटक खेल्नेछ।
झिनो आशा लिएर हङकङमा विश्वकप छनोट खेल्न पुगेको नेपाली टोलीले सुरुमा कमजोर खेल प्रस्तुत गरेपनि प्रभावशाली अन्त्य गर्दै चार राष्ट्र सम्मिलित प्रतियोगितामा दोस्रो स्थान सुरक्षित गरेपछि एसिया कपका लागि छनोट भएको हो।
अर्को महिना थाइल्याण्डमा हुने छ राष्ट्र सम्मिलित प्रतियोगिताको लक्ष्य सुनाउँदै नेपाली टोलीका प्रशिक्षक राजु बस्नेतले भने, “प्रतिपक्षीहरु राम्रा, बलिया हुन्छन् भन्ने मानसिकता हाम्रा खेलाडीहरुमा भएकोले सुरु-सुरुमा नतिजा राम्रो हुन नसकेको हो। तर अहिले जुन खालको प्रदर्शन उनीहरुले गरेका छन् एसिया कपमा हाम्रो प्रतिस्पर्धा भनेको बांग्लादेश र श्रीलंकालाई पराजित गर्नु हुनेछ।”
नेपाली महिला टोलीले अन्तर्राष्ट्रिय उपाधि जितेको यो सात वर्ष पछि हो।
सन् २००९ मा भएको ‘एसीसी वीमेन्स’ प्रतियोगितामा बांग्लादेशसंग हारेर उपविजेता बनेपछि नेपालले कुनै अन्तर्राष्ट्रिय उपाधि हात पारेको थिएन।
आत्मविश्वास
नेपाली टोलीकी कप्तान रुविना क्षेत्रीले एसिया कपमा छनोट हुनुलाई सुस्ताएको महिला क्रिकेटमा उर्जा थपिएको रुपमा व्याख्या गरिन्।
विश्वकप छनोटमा पुग्न नसकेकोमा कुनै गुनासो नभएको भन्दै उनले भनिन्, “एसिया कपमा टेस्ट खेल्ने चारवटा टोलीसंग खेल्न पाउने छौं। त्यो सफलताले गर्दा मलाई विश्वकपको छनोटमा नपुगेकोमा खल्लो लागेको छैन। अहिले हाम्रो आत्मविश्वास बढेको छ। भारत, पाकिस्तान जस्ता टेस्ट राष्ट्रसंग प्रतिस्पर्धा गरेर राम्रो नतिजा निकाल्ने जुन हाम्रो पुरानो लक्ष्य छ, त्यो पूरा हुने वाला छ भन्ने कुरामा म विश्वस्त छु।”
घरेलु क्रिकेटको समस्या झेल्दै आएको महिला टोलीले दुई वर्षपछि पहिलो पटक प्रतियोगिता खेल्ने मौका पाएको थियो।
महिला टोली सोमबार नेपाल फर्किनेछ। –वीवीसी नेपाली
