शम्भु यादव

लहान । सिरहाको सिमावर्ती गाउँ ईटाटार–८ ‘कमलपुर’ टोल । पंक्तिकार पुग्दा धान वाली काट्ने समय भएकोले अधिकत्तर गाउँले खेतमा धान काट्न व्यस्त देखिन्थे । एउटा घरमा छोरा उन्मेको खुसीयाली उत्सव चल्दै थियो । साउण्डमा थरिथरिका गितहरु बज्दै थियो । मानिसहरु भोज गर्नलाई यताउता हिड्दै थिए । नजिकै एउटा छाप्रोको कुनामा रामवत्ती देवी टाउँकोमा हात्त राखेर बिलाप गर्दै थिईन ‘ऋण पनि लाग्यो बच्चा पनि गुम्यो ।’ उनको यो बिलापले यहाँ पुग्ने जोकोहिको आँखा भरिन्छ । 

घाम र पानी समेत राम्ररी थेग्न नसक्ने छाप्रोको बास त्यसमाथि सन्तान जन्माउने सपना चकनाचुर भएको, घटना । सो क्रममा ऋण लिएर उपचारमा खर्चेको चर्को रकम । रामबत्तीको आँखासँगै दिमाग पनि भारी बनेको छ । एउटी महिला नौ महिनासम्म बच्चालाई गर्भमा राखेर जन्माउने अपार सपना सजाएकी हुन्छिन् । रामवत्ती पनि बच्चा जन्माउने अपार सपना बुनेकी थिईन । तर उनको सपना तब चकनाचुर भयो जब लहान स्थित लिलामदन पोलिक्लिनिक एण्ड प्रसुती गृहले उपचारको क्रममा बच्चा गर्भमै मरिसकेको जनाकारी दिए ।
घटना बारे रामवत्तीका श्रीमान् लालबाबु यादव भन्छन्, ‘एक सत्ता अगाडि यो पोलिक्लिनिकले गर्भको बच्चा सकुशल भनेको थियो ।’ एक सातापछि पुनःउपचारका लागि आउँदा बच्चा गर्भमै मृत्यु भएको भनेपछि स्तब्द भए । कातिक २९ गत्ते रक्तश्राव हुन थालेको जानकारी रामवत्तीले पत्ती श्रीमान् लालबाबुलाई गराएपछि एम्बुलेन्स चढेर लहान ३ स्थित लिलामदन पोलिक्लिनिक पुगेका थिए । यहाँ तिन दिन भर्ना गरेर उपचार गरेपछि रामवत्तीलाई घर पढाइएको थियो । त्यो बेला यो पोलिक्लिनिकले गर्भको बच्चा सकुशल भनेको थियो । तिन दिनको उपचार खर्च वापत पोलिक्लिनिकलाई १३ हजार बुझाएको लालबाबुले बताए ।
शनिवार राती (मंसिर ६ गत्ते) साँझ ७ बजेबाट रामवत्तीलाई पुनः उही समस्या दोहरियो । सोही राती ९ बजे एम्बुलेन्स चढेर उनी यही पोलिक्लिनिक पुगिन । केहि बेरमै चिकित्सकले बच्चा गर्भमै मरिसकेको जानकारी दिदैं अप्रेसन गर्नुपर्ने बताए । अप्रेसन गरेर गर्भमा मृत्यु भएको बच्चा निकाल्नुपर्छ भनेपछि मैले मन्जुरी दिए लालबाबु भन्छन्,‘यसको सम्पूर्ण खर्च ४० हजार लाग्छ भनेको थियो । ‘सोमवार दिउँसो डिस्चार्ज गर्दा बखत ५० हजारको बिल थमायो, उनले भने । बच्चा पनि खेर गयो हजुर गरिब छु ४० हजार लिएर मानिहाल्नुस भन्दा पनि मानेनन्, उनले भने । उपचार गराईसकेपछि माँगेजति रकम नबुझाउँदा बिरामी घर लग्न मिल्दैन, पुनः १० हजार ऋण खोजेर ५० हजार बुझाएँ, उनले थपे । मेरी पत्नीलाई कहीं टाँका लगाएको छैन, तर अप्रेसन गरेको भनेर चर्को रकम असुले । भक्कनिंदै उनले भने,‘अनपढ देहातका मानिसलाई ठग्नेमाथि कारबाही होस् ।’
रामवत्ती भन्छिन्,‘कोख पनि पैसा पनि खेर गयो ।’ हामी गरिबलाई अप्रेसन नै नगरि अप्रेसन गरेको भन्दै चर्को रकम असुल्नेलाई कारबाही चाहन्छु ।’ अहिले हामी ओत लाग्ने छाप्रो पनि ऋणमा बन्धकी छ, उनले सुनाईन । यही पोलिक्लिनिकमा दुई पटकमा ६३ हजार रकम बुझाईसकेको सुनाउँदै उनी भन्छिन्,‘बच्चा बाचेको भए । ऋणको भारी हल्का हुन्थ्यो ।’ बच्चा गुमाएको पिडासँगै थपिएको ऋणले बिल्लिाबाठै भयौं, उनले आँशु विसाउँदै भनिन् ।
यो गाउँका धेरै महिला यस्तै प्रकृतीको उपचार विराटनगर र धरानमा गराउँदा अधिकत्तम २२ हजार खर्चेको सुनाउँदै स्थानीय वैद्यनाथ यादव भन्छन्,‘अनपढलाई ठग्ने यो पोलिक्लिनिकमा सरकारले कडा कारबाही गर्नुपर्छ ।’ ‘सेवाको नाममा लुट मच्चाउनेलाई हदैसम्मको कारबाही गर्न सरकारसंग माँग गदर्छु ।’ उनले भने,‘ ताकि रामवत्तीजस्ता अन्य अनपढ देहाती नढगियोस् ।’
यस्तै, लहान–८ का सन्तोष राई गर्भवत्ती पत्नीलाई स्वास्थ्य जाँच गराउन साउनको दोस्रो सात्ता लिलामदन पोलिक्लिनिक एण्ड प्रसुती गृह पुगे । यहाँ भिडियो एक्सरे गरेर चिकित्सकले समय पुगिसक्यो भर्ना गर्नुपर्छ भन्यो । उनले चिकित्सकको सल्लाहमा पत्नीलाई भर्ना गराए । सोही राती उनलाई ब्यथा सुरु भयो । भोलिपल्ट चिकित्सकले सन्तोषलाई भन्यो–बच्चाको मुटुको चाल कम हुँदै छ छिटो बाहिर लग्नुस् । उनी अतिए ।
पहिलो प्राथमिकता मेरो पत्नीको ज्यान जोगाउनुलाई दिए उनी भन्छन्,‘विराटनगर स्थित निजि अस्पताल पुर्याउँदा चिकित्सकले भने ढिला गर्नुभो बच्चा मरिसक्यो ।’ मृत बच्चालाई त्यही फ्याकेर पत्नीको उपचार गराएर फर्केपछि सन्तोष लिलामदन पोलिक्लिनिक पुगे । पोलिक्लिनिक पक्षले यहाँ खर्चेको रकम क्षतीपुर्ती स्वरुप फिर्ता गर्ने बचन दिएको सन्तोषले बताए । आजभोली भन्दै घटना सेलाउँदै गएपछि रकम फिर्ता गर्न ईन्कार गरिदियो उनी भन्छन्,‘समाजिक छलफलबाट पनि रकम फिर्ता गर्न नमान्दा प्रसाशनमा उजुरी दर्ता गराए ।’ सन्तोष भन्छन्,‘जिल्ला प्रसाशनमा उजुरी दिएको चार महिना भयो ।’ उनले  साउन २७ गते जिल्ला प्रसाशन कार्यालय सिरहामा उजुरी दर्ता गराएका छन् ।
अहिलेसम्म प्रशसनबाट मेरो उजुरी उपर के कारबाही भयो जानकारी पाएको छैन, उनले भने । पिडित विरामीको जाहेरी लिन मानेन प्रहरी मंसिर ६ गत्ते आफुसँग लहान स्थित लिलामदन पोलिक्लिनिक एण्ड प्रसुती गृहले गर्दै नगरेको अप्रेसनको चर्को रकम असुली गरेको भन्दै जाहेरी लिएर आएका पिडितको जाहेरी लहान प्रहरीले लिन मानेन् । ठगी मुद्धामा जाहेरी लिएर आएका उनले अस्पतालले दिएको प्यान विल समेत संलग्न राखेका थिए । मुद्दाको झमेलामा छिर्न नचाह्ने उनले आफुजस्तै अरुपनि नठगियोस भनेर निसाफका लागि अघि बढेका थिए । उनले भने,‘पहिला पनि मलाई अस्पताल पक्षबाट थाना फौजदारीको झन्झटमा नउल्झीन सचेत गराइएको थियो ।’ आखिर त्यही भयो ।
सहयोगी मार्फत जाहेरी दिन ईलाका प्रहरी कार्यालय लहानका आएका लालबाबुका सहयोगीलाई डिएसपी राजकुमार केसीले ठगी भएको पूर्ण प्रमाण ल्याए मात्र केही गर्न सकिने बताएका छन् । आफुसँग पोलिक्लिनिकले दिएको उपचारको बिल मात्र छ, पिडित लालबाबुले भने । पढेलेखेको बुझ्ने भएको भए ठगिने नै थिईन नी, उनको भनाई छ ।
गैरकानुनी कार्य गर्ने लिलामदन पोलिक्लिनिकको सेवाको तयारी जिल्लाभरी ४८ वटा पोलिक्लिनिकलाई जिल्ला स्वास्थ्य कार्यालय सिरहाले सञ्चालन अनुमती दिएको छ । जसमा पाँच वटा सेवा गर्न पाईने प्रावधान छ । जिल्ला स्वास्थ्य कार्यालयका ‘फोकल पर्सन’ एवँ निमिति प्रमुख उमेशलाल कर्ण भन्छन्,‘ लिलामदन पोलिक्लिनिक एण्ड प्रसुती गृहलाई शल्यक्रिया गर्ने अनुमती छैन् ।’ यो पोलिक्लिनिकलाई प्रसुती(नर्मल), बहिरंग, ईसिजि, प्रयोगशाला र एक्सरे सेवा सञ्चालन गर्न मात्र ईजाजत पत्र दिइएको कर्णले बताए । यस पोलिक्लिनिकले अल्ट्रासाउण्ड र फर्मेसी सेवा संचालन गर्ने ईजाजत समेत नभएको उनले बताए । ‘संचालन अनुमति पाएका यहाँका कुनैपनि पोलिक्लिनिकमा शल्यक्रियामार्फत प्रसुती गराउने ईजाजत छैन’ उनले भने,‘ईजाजत बाहेकका सेवा सञ्चालन गर्नेलाई सम्पूर्ण सेवा बन्द गर्ने सम्मको कारबाही ब्यवस्था छ ।’
यो पोलिक्लिनिकलाई यस अगाडि अन्तिम पटकका लागि सचेत गराईसकिएको छ, उनले भने,‘यसपटक सम्पूर्ण सेवा बन्द गरेर कारबाही चलाउने तयारीमा हामी छौं ।’ ‘ईजाजत नै नभएको काम गर्ने, दिदै नदिएको सेवा वापतको रकम असुल्ने कार्य गैरकानुनी हो उनले भने,‘सम्पूर्ण सेवा बन्द गर्ने गरि काबाही चलाउँछौं ।’
गैरकानुनी हरकत लुकाउन समाचार संकलनमा गएका पत्रकारलाई हातपात गर्ने मोबाईल फुटाउने घटना दुखद हो, उनले भने । यो घटनाले हामीलाई मात्र नभई स्वास्थ्यमन्त्रालयको पनि ध्यानआकर्षण भएको कर्णले भने । स्वास्थ्य मन्त्रालयबाट गैरकानुनी कार्य गर्ने यो पोलिक्लिनिकमाथि हदैसम्मको कारबाही गर्न निर्देश भएको कर्णले बताए ।

– See more at: http://hamrakura.com/news-details/17572/2016-12-11#sthash.2oN3SfEM.dpuf

यो खबर पढेर तपाईलाई कस्तो महसुस भयो ?
0
0
0
0
0
0
0

प्रतिक्रिया दिनुहोस् !

संबन्धित खबर

ताजा खबर


धेरै पढिएको