काठमाडौं \ नेपाल विद्यार्थी संघले स्वतन्त्र विद्यार्थी युनियन निर्वाचनको कार्यतालिका यथाशिघ्र निर्माण गर्न माग गरेको छ । ०७३ पौष २६ गते देखि माघ ३ गते सम्म बसेको संघको केन्द्रिय समिति बैठकको निर्णय सार्वजनिक गर्दै कार्यतालिका यथाशिघ्र निर्माणको माग गरिएको हो ।
संघको केन्द्रिय कार्यालयमा पत्रकार सम्मेलन गर्दै अध्यक्ष नैनसिंह महरले बैठकका निर्णय सार्वजनिक गरेका हुन् । संघले पहिलो निर्णय स्ववियुको निर्वाचन अविलम्ब गर्न माग गरेको छ । त्यस्तै उमेर हदबनदकिो विपक्षमा आफुहरु रहेको भन्दै कम्तीमा १ पटक हदबन्दी विनानै निर्वाचन गर्नुपर्ने पक्षमा संघ रहेको उल्लेख छ । निर्वाचन प्रणालीमा मिश्रित निर्वाचन प्रणलीमा सहमति जनाउँदै संघले समानुपातिकतर्फको पदाधिकारी समानुपातिक तर्फबाट निर्वाचित हुने व्यवस्था हटाएर प्रत्यक्ष र समानुपातिक दुवैतर्फका हुनसक्ने व्यवस्था गर्न माग गरिएको छ । ‘स्ववियु निर्वाचनको कार्यतालिका र आचारसंहितलाई व्यवहारिक र परिस्कृत बनाई यथाशिघ्र कार्यतालिका निर्माण गर्न समेत नेविसंघ जोदार माग गर्दछ’ निर्णयमा भनिएको छ । उमेरहदबनदी र निर्वाचन प्रणालीका विषयमा विश्वविद्यालयलाई ज्ञापनपत्र बुझाउने नेविसंघको निर्णय छ ।
केन्द्रिय सदस्य प्रेमबहादुर शाहीले अध्यक्ष महरको संयोजकत्वमा ७ हजार १ सदस्यीय ‘स्ववियु निर्वाचन परिचालन तथा व्यवस्थापन मूल तयारी समिति’ समेत गठन गर्ने निर्णय भएको बताए । अन्य उपसमिति गठन भने नेविसंघ केन्द्रिय पदाधिकारी बैठकबाट गरिने पनि उनले बताए । संघले पद्मकन्या क्याम्पसमा नेविसंघ नेतृ सिता मिजारमाथी अखिल क्रान्तिकारीले गरेको आक्रमणको भत्र्सना गर्दै घाइतेको स्वास्थ्यलाभको कामना समेत गरेको छ ।
