काठमाडौं- अन्ततःसंविधान संशोधन विद्येयक पारित हुने सम्भावना क्षिण बनेको छ । प्रधानमन्त्री पुष्पकमल दाहाल प्रचण्डनै यस विषयमा पछि हटेपछि संशोधन प्रस्ताव फेल हुने भएको हो ।
नेपाल आदिवासी जनजाति महासंघका पदाधिकारीसँग बिहीबार बालुवाटारमा कुराकानी गदैं प्रचण्डले अहिलेको अवस्थामा संविधान संशोधन विद्येयक पारित हुनै नसक्ने बताएको बालुबाटार स्रोतले बतायो ।
भेटमा प्रधानमन्त्रीले राप्रपाले संविधान संशोधन प्रस्ताव अघि बढाए समर्थन नगर्ने बताएको सुनाए । उनले भने, प्रस्ताव मतदानमा गयो भने विपक्षमा मतदान गर्ने उहाँहरुको प्रष्ट कुरा छ । यति कुरा जान्दाजान्दै मतदानमा जाँदा संशोधन प्रस्ताव पारित हुँदैन, फेल हुन्छ ।’ उनले अघि भने, त्यसले समस्या समाधान होइन, झन् बल्झाउँछ, त्यसैले अलिकति समय लिएर निर्णयमा पुग्नु बुद्धिमानी हुन्छ ।’
अहिलेको संविधान मान्दैनौं भन्दा मुलूक उल्टो दिशातिर जानसक्ने खतरा औल्याउँदै प्रधानमन्त्रीले प्रचण्डले प्राप्त अधिकार जोगाउँदै अगाडि बढ्नु राम्रो हुने बताए । ‘संविधान जारी गर्ने बेला मेरो पार्टीले पनि आठ बूंदे असहमति दर्ज गरेको छ ।
तर, अहिलेको संविधान पनि मान्दैनौं भनेर हामी नै यो संविधानको विरुद्ध लाग्दा त्यसको परिणाम के होला ?’ उनले भने, तपाईहरु सोच्नुहोस्, भुईंको टिप्न खोज्दा पोल्टाको खस्नु हुँदैन । अहिलेको संविधान खारेज भयो भने २०४७ को संविधान आउने खतरा रहन्छ । के तपाई हामीले चाहेको त्यही हो त ? ’ सरकार जनजाति अधिकारको पक्षमा रहेको बताउँदै प्रधानमन्त्रीले आदिवासी जनजाति प्रतिष्ठान खारेज नहुने बताए ।
भेटमा आदिवासी जनजातिका प्रतिनिधिहरुले आदिवासी जनजाति उत्थान प्रतिष्ठान यथावत राख्न, जनजाति मन्त्रालय गठन गर्न, स्थानीय तहमा स्वायत्त, संरक्षित र विशेष क्षेत्रको व्यवस्था गर्न, आदिबासी अधिकारसहित संविधान संशोधन गर्न, स्थानीय तहको सीमा निर्धारण गर्दा पहिचान जडित क्षेत्रलाई खण्डित नगर्न प्रधानमन्त्रीको ध्यानाकर्षण गराएका थिए ।
प्रचण्डनै संशोधन विद्येयकमा पछि हटेपछि उता मधेसी मोर्चा भने अलमलमा परेको छ । मोर्चाका केही नेताहरुले सरकारलाई दिएको समर्थन फिर्ता लिएर आन्दोलन गर्नुपर्ने बताएका छन् भने कतिपयले सरकारलाई दिएको समर्थन यथास्थितिमै राखि सरकारसँगको कुराकानीलाई निरन्तरता दिने बताइरहेका छन् ।
यो खबर पढेर तपाईलाई कस्तो महसुस भयो ?
