काठमाडौं । नेकपा एमालेले सप्तरीमा सोमबार भएको घटनाको जिम्मा मधेसी मोर्चाले लिनुपर्ने बताएको छ । नेकपा एमालेले अहिले पत्रकार सम्मेलन गर्दै यस्तो बताएको हो ।
पत्रकार सम्मलेनमा पार्टी प्रचार विभाग प्रमुख योगेश भट्टराईले एमालेले शान्तिपूर्ण आन्दोलनको क्रममा मोर्चाका कार्यकर्ताले अमर्यादित व्यवहार प्रदर्शन गरेपछि स्थिति तनावपूर्ण बनेको बताए ।
“मोर्चाको क्रियाकलापको परिणाम नै सप्तरीमा देखा परेको छ,” पत्रकार सम्मेलनमा उनले भने, “सम्पूर्ण जिम्मेवारी मोर्चाले लिनुपर्छ । एमाले पार्टी कार्यालयमा आगजनि भएको छ । एमालेका कार्यकर्तालाई जिल्ला खाली गर्न भनिएको छ ।”
उनले शुरुदेखि नै गृह मन्त्रीको अभिव्यक्ति पनि आशंका गर्ने खालको भएकाले उनले पनि उन्मुक्ति पाउन नहुने धारणा राखे । त्यसमाथि सप्तरीमा सुरक्षाको जिम्मा लिएका अधिकारीलाई फिर्ता बोलाउनुलाई पनि त्यसले पुष्टि गरेको बताए ।
यो खबर पढेर तपाईलाई कस्तो महसुस भयो ?
