काठमाण्डौ–राप्रपा प्रजातान्त्रिकका अध्यक्ष पशुपतिशमशेर राणाले कमल थापाकै कारण पार्टी एकता प्रक्रिया रोकिएको आरोप लगाएका छन्।
सोमबार काठमाडौंमा आयोजित पत्रकार साक्षात्कार कार्यक्रममा राणाले परिपक्व तरिकाले एकता गर्नका लागि ४–५ दिनको समय माग्दा थापाले नमानेको जिकिर गरे।
एकीकृत राप्रपा राष्ट्रवादीका अध्यक्ष डा. प्रकाशचन्द्र लोहनी र आफूले केही समय गम्भीर छलफल गरेर एकता घोषणा गरौं भन्दा थापा नमानेको राणाले बताए।
कमल थापाको तातै खाउँ जल्दै मरौं प्रवृत्तिका कारण एकता प्रक्रिया तत्कालका लागि रोकिएको उनले बताए।
तीन वटै राप्रपा एकताका लागि आफू अझै पनि तयार रहेको भन्दै राणाले हतारमा एकता गरेर प्रभावकारी नहुने बताए। एकताका लागि भएको छलफलमा महत्वपूर्ण विषयमा सहमति जुटिसके पनि पार्टीको झण्डा, चिन्ह र नाम टुङ्गो नलागेको राणाले जानकारी दिए।
कमल थापाले पार्टीको नाम, चुनाव चिन्ह र झण्डा राप्रपा नेपालकै कायम राख्नुपर्ने अडान राखेकाले पनि एकतामा असर परेको राणाले बताए।
‘तीन वटा पार्टी मिल्दा सबैले सम्झौता गर्नुपर्छ। नाम, झण्डा र चुनाव चिन्ह सबै एउटै पार्टीको कायम राख्न सकिदैन। गाईलाई चुनाव चिन्ह मान्न म सक्दिनँ,’ राणाले भने।
एकीकृत पार्टीले गणतन्त्र मान्ने कि नमान्ने विषयमा पनि फर्मुला तयार भइसकेको भन्दै राणाले उक्त फर्मुला भने अहिले सार्वजनिक नगर्ने बताए।
धर्म निरपेक्षका विषयमा भने सहमति भइसकेको उनले बताए। तीन वटै राप्रपा हिन्दुराष्ट्रको पक्षमा रहेको राणाको भनाई थियो।
‘नेपाललाई जसरी भए पनि हिन्दु राष्ट्र बनाएरै छाड्ने राणाले बताएका छन्। हिन्दु राष्ट्रमा त नेपाल जानैपर्छ। यो नै हाम्रो पहिचान हो । जसरी पनि हिन्दुराष्ट्र बनाइन्छ,’ राणाले भने।
नेपाली कांग्रेस तत्कालिन नेकपा एमाले र माओवादीले नेपाललाई धर्मनिरपेक्ष राष्ट्र बनाएर देशका लागि अन्याय गरेको राणाको आरोप थियो।
यो खबर पढेर तपाईलाई कस्तो महसुस भयो ?
