काठमाडौं, २३ असोज। नेपालले भन्दा पहिला भन्सार, अध्यागमन र सीमा सुरक्षाका लागि भवन निर्माण थालेर कोरला नाका सञ्चालन गर्ने कूटनीतिक संकेत दिएको उत्तरी छिमेकी मुलुक चीनका राजदूत यु होङ भन्सार नाकाको निरीक्षण र माथिल्लो मुस्ताङका नेपाली जनप्रतिनिधिसँग छलफल गर्न सोमबार लोमान्थाङ जाने भएकी छिन् । त्यसका लागि उनी आइतबार नै जोमसोम पुगेको सुरक्षा स्रोतले जानकारी दिएको छ ।
सुरक्षा स्रोतका अनुसार राजदूत होङ आज सोमबार बिहान माथिल्लो मुस्ताङको केन्द्र लोमान्थाङ पुग्ने कार्यक्रम छ । उनी त्यहाँ विभिन्न कार्यक्रममा सहभागी हुने बताइएको छ । स्रोतका अनुसार राजदूत होङले भ्रमणको क्रममा लोमान्थाङ क्षेत्रमा चीन सरकारले वितरण गरेको सोलार (सौर्य) विद्युत्को पनि अवलोकन गर्ने कार्यक्रम छ । अत्यधिक हावा चल्ने माथिल्लो मुस्ताङमा तलबाट लगेको जलविद्युत्भन्दा सोलारको विद्युत् नै भर पर्दो माध्यम बनेको छ ।
स्रोतका अनुसार राजदूत होङले लोमान्थाङ बजारमा रहेको गुम्बाको पनि निरीक्षण गर्ने कार्यक्रम छ । निरीक्षणपछि राजदूत होङले गत वैशाखमा निर्वाचित नेपाली जनप्रतिनिधिहरुसँग छलफल गर्ने कार्यक्रम तय भएको छ । भारत, बेलायतलगायतका देशका नेपालस्थित राजदूत र अन्य कर्मचारीहरुले माथिल्लो मुस्ताङको भ्रमण र त्यहाँ सहयोग बढाउनथालेपछि चीनले माथिल्लो मुस्ताङको गतिविधिलाई सूक्ष्म तरिकाले हेरिरहेको छ । एसिया मामिलामा राम्रो जानकारी राख्ने राजदूत होङ चिनियाँ वरिष्ठ कूटनीतिज्ञ पनि हुन् । उनी २०७३ साल कात्तिक २२ गते नेपालमा राजदूत पद सम्हाल्न आएकी थिइन् ।
भारतले नाकाबन्दी लगाएको बेला तत्कालीन केपी शर्मा ओली नेतृत्वको सरकारले लोमान्थाङको कोरला नाका सञ्चालनलाई उच्च प्राथमिकता दिए पनि अहिलेसम्म नेपालले भन्सार, अध्यागमन र सुरक्षा निकायको कार्यालय कहाँ निर्माण गर्ने तय गर्नसकेको छैन । चीनले आफ्नो भूमिमा भन्सार, अध्यागमन र सुरक्षाकर्मीका लागि विशाल भवन निर्माण सुरु गरे पनि नेपालतर्फको भाग सुनसान छ । नेपालतर्फ ११ मिटरको सडक निर्माण थालिए पनि त्यसले सन्तोषजनक रुपमा गति लिनसकेको छैन ।
चीनले भने सडकसँगै भन्सारको लागि चाहिने पूर्वाधार निर्माणमा ४० दिनमै चमत्कार गरेको छ । चिनियाँ राजदूतले भ्रमणको क्रममा नेपाली जनतप्रतिनिधिसँग छलफल गरेर निर्माणाधीन भन्सार कार्यालय र कोरला नाकाको निरीक्षण गर्ने स्रोतको दाबी छ । कोरला नाकाको नेपाल र चीनतर्फको भूभाग समथर भएको कारण उक्त नाका सञ्चालन गर्न सहज छ । चीनलाई भन्दा नेपाललाई कोरला नाका आवश्यक परे पनि नेपालले भौतिक पूर्वाधार निर्माणमा चासो दिएको छैन । आर्थिक दैनिकबाट
