राजविराज । सप्तरी जिल्लाका  अहेव तथा अनमी जिल्ला स्तरीय संघर्ष समिति सप्तरीले तीन बुँदे माग राख्दै प्रमुख जिल्ला अधिकारी, जिल्ला स्वास्थ्य कार्यालयका प्रमुख तथा नेपाल पत्रकार महासंघ सप्तरीलाई छुट्टाछुट्टै ज्ञापनपत्र बुझाएको छ ।
स्वास्थ्य सेवा प्रथम प्रवेश बिन्दुुु चौथो तह भएकोले खुल्लाबाट शतप्रतिशत पदपूर्ति हुनुपर्ने, स्थानीय सेवा संगठन तथा संचालन ऐन २०८१ को दफा २९ को उपदफा २ मा लेखिएको बाध्यतात्मक वाक्यांश (कर्मचारी समायोजन ऐन २०७५ बमोजिम समायोजन भएका स्वास्थ्य सेवाका कर्मचारी यसै ऐन बमोजिम बढुवा पाइसकेपछि उपदफा २ बमोजिम मात्र स्तरबृद्धि हुनेछ) भनी राखिएकोमा त्यसलाई हटाउनुपर्ने माग गरिएको छ ।
यस्तै, नेपाल स्वास्थ्य सेवा ऐेन २०५३ बमोजिम विगतदेखि पाउँदै आइरहेको २ तह स्तरबृद्धि गरिनुपर्ने माग ज्ञापन पत्रमा गरिएको छ ।
मागहरु पूरा नभए आगामी चैत २५ गतेदेखि मुख्यमन्त्रीको कार्यालयमा धर्ना बस्ने चेतावनी उनीहरुले दिएका छन् ।
आ–आफ्नो कार्यालयको सेवा प्रवाहमा असर नपर्ने गरि धर्ना कार्यक्रम हुने उनीहरुले बताएका छन् ।
कर्मचारीको वृत्ति विकासमा पर्न गएको असरप्रति प्रदेश तथा सरकार गठित सुझाव समिति गम्भीर नदेखिएकोले बाध्य भएर आन्दोलन तथा धर्नाको कार्यक्रम तय गरेको ज्ञापनपत्रमा उल्लेख गरिएको छ ।