काठमाडौं । एकता महाधिवेशन सम्पन्न भएको एक साता नबित्दै राप्रपामा संकट सुरु भएको छ । महाधिवेशनमा राप्रपा नेपालका कमल थापाको पक्षमा एकलौटी परिणाम गएपछि पुरानो राप्रपा पक्षधरले अलग बाटो तय गर्ने भएको छ ।
सम्पन्न महाधिवेशनद्वारा निर्वाचित ९५ जना केन्द्रीय सदस्यमध्ये ६० जना कमल थापा पक्षका छन् भने १६ जना दिपक बोहोरा पक्षधर, पाँचजना डा. प्रकाशचन्द्र लोहनी पक्ष, चारजना पशुपतिशमशेर राणा पक्ष र १० जना तटस्थ छन् ।
अल्पमत पक्षलाई पेलेरै लैजाने संकेत नवनिर्वाचित अध्यक्ष थापाले गरेपछि पुरानो राप्रपा पक्षधरको दिनहुँजसो भेला हुने गरेको छ । आइतबार बिहान सम्पन्न भेलाले कुनै लो–प्रोफाइलको मान्छेलाई हलो चुनाव चिह्न हुने गरी छुट्टै राप्रपा दर्ता गराउने र आवश्यक परे त्यही पार्टीको ब्यानरमा आगामी स्थानीय तह, प्रदेश तह र केन्द्रीय तहको निर्वाचन लड्ने निर्णय गरेको छ ।
तर तत्कालका लागि भने पार्टीभित्रै संघर्ष गर्ने गरी पूर्वकेन्द्रीय सदस्य महेश्वर रोकाको संयोजकत्वमा एक सय एक सदस्यीय राप्रपा सुदृढीकरण अभियान गठन गरिएको छ । ४३ जनाबाहेक अभियानका अन्य सदस्यको नाम गोप्य राखिएको संयोजक रोकाले बताए ।
उनका अनुसार सुदृढीकरण अभियानको राष्ट्रिय भेला आगामी चैत ४ र ५ गतेका लागि तय गरिएको छ । भेलामा वरिष्ठ नेता डा.लोहनी र राणा सहभागी हुने तय भइसके पनि लोकेन्द्रबहादुर चन्दको सहभागिताबारे तय नभइसकेको संयोजक रोकाले बताए ।
चुनाव हार्ने अनि पार्टी फोर्ने गर्न मिल्छ ? भन्ने प्रश्नमा रोकाले भने– ‘हामीले पार्टी फोर्न लागेको होइन, अध्यक्ष थापा सच्चिनुभयो भने पार्टी फुट्दैन, तर चुनावमा धाँधली र सेटिङ गरिएका कारण अध्यक्ष थापाप्रति अविश्वास सिर्जना भएको हो ,तरुणले उल्लेख गरेको छ ।’
कसरी धाँधली र सेटिङ भयो ? भन्ने प्रश्नमा उनले भने– ‘चुनावमा कर्मचारी र तस्करहरूको सेटिङ भएको सुनिएको थियो, तर राजनीतिमा पनि सेटिङ भयो, मण्डलेकरण भयो, जनाधार भएका र जिल्लामा स्थापित भएका नेताहरूलाई नंग्याइयो, वरिष्ठ हौं भन्नेहरू नै कमल थापासँग लम्पसार परे, अब कमल थापाले जस्तो व्यवहार गर्नु हुन्छ, हामी पनि त्यहीअनुसार अघि बढ्छौं ।’
यो खबर पढेर तपाईलाई कस्तो महसुस भयो ?
