नेपालगन्ज । नेपालगन्जमा हुने एमालेको मेची महाकाली अभियान अन्तर्गत आमसभाविरुद्ध बन्द आह्वान गरेका मधेसी मोर्चाका कार्यकर्ताले यात्रुबाहक बसमा आगजनी गरेका छन् ।
संयुक्त लोकतान्त्रिक मधेसी मोर्चाले उढरापुरमा भे १ ख २०४२ नम्बरमा बसमा आगजनी गरेका हुन् । बर्दियाको राजापुरदेखि दाङको तुलसीपुर सडक खण्डमा चल्ने गाडीको भित्री भाग जलेको छ ।
एमाले सभाको विरोधमा मोर्चाले नेपालगन्ज बन्द आह्वान गरेको थियो । मोर्चाले सोनपुर र उढरापुरमा कार्यकर्ता बोक्न गएका केही सवारीलाई रोकेका थिए ।
सप्तरीमा एमालेको सभा बिथोल्नेक्रममा भएको झडपमा पाँच जनाको मृत्यु भएकाले नेपालगन्जमा सुरक्षा कडा पारिएको छ । ठूलो संख्यामा सुरक्षाकर्मी परिचालन गरिएको छ ।
नेकपा एमालेको मेची-महाकाली अभियानअन्तर्गत नेपालगन्जमा मधेसी मोर्चाले अवरोध गरेपछि आमसभास्थल परिवर्तन गरिएको छ ।
यसअघि आमसभास्थल रामलीला मैदानमा गर्ने तयारी गरिएको थियो । तर, त्यसलाई सारेर सडक डिभिजन कार्यालयमा आमसभा आयोजना गरिँदैछ ।
