राजविराज, १४ कात्तिक । पूर्वपश्चिम राजमार्गअन्तर्गत सप्तरीको रुपनी गाउँपालिका–१ मा आज साँझ गए राति मोटरसाइकल दुर्घटना हुँदा एक जनाको मृत्यु भएको छ भने दुई जना गम्भीर घाइते भएका छन् ।
पूर्वबाट पश्चिमतर्फ जाँदै गरेको दर्ता नभएको नयाँ मोटरसाइकल अनियन्त्रित भई कल्भर्टमा ठोक्किँदा मोटरसाइकलमा सवार राजविराज नगरपालिका–८ बस्ने २१ वर्षीय धीरज यादवको मृत्यु भएको छ । दुर्घटनामा परी गम्भीर घाइते यादवको राजविराजस्थित गजेन्द्र नारायणसिंह सगरमाथा अञ्चल अस्पतालमा उपचारका क्रममा मृत्यु भएको प्रहरी उपरीक्षक मुकेशकुमार सिंहले बताउनुभयो ।
सोही दुर्घटनामा मोटरसाइकल चालक राजविराज नगरपालिका–८ कै २२ वर्षीय आशितोष साह र सोही मोटरसाइकलमा सवार अजय परियार गम्भीर घाइते भएका छन् । उनीहरुको सगरमाथा अञ्चल अस्पतालमा राजविराजमा उपचार भइरहेको छ ।
